
蔣慧云的小書包 台語版
175粉絲
「臥冰求鯉」是《二十四孝》收錄的故事之一,主角王祥因此廣為世人所知。然而,王祥同父異母年幼的弟弟王覽,卻能為哥哥挺身而出,他們兄弟的故事,也很值得孩童效法,所以這篇「孝心哥與仗義弟」,講的不只是「臥冰求鯉」的孝,也講兄弟間的情義。
🍄 本集制作:
轉譯:怪婆婆
播音:Coco
配樂合成:怡伶
字幕:惠善
影片合成:芫安 瑛垓
監製:李智鳴 蔣慧云
🎒 訂閱小書包會員,讓孩子從故事長本事
#乾淨校園夏令營 #兒童 #bekindbecool #善良很酷 #kindnessiscool
AI 生成·可能包含錯誤
視頻概述
AI 生成這是一個關於善良與救贖的故事,講述了心地純良的熊熊在繼母的虐待下,依然用愛與寬容對待家人。他不僅多次保護親哥哥,甚至在極端寒冬中用身體溫暖冰河以獲取食物孝敬繼母,最終感化了繼母並與哥哥共同獲得幸福與成功。
阿兄顧小弟這是常情
毋過這个故事咧
煞是小弟咧照顧阿兄
這到底是按怎咧
天拄光爾 緊共我起來
王祥猶未睏醒咧
後母就共伊叫起來矣
後母歹聲嗽講
王祥 去 共牛牢摒予清氣
王祥那哈唏那行去牛牢
牛牢內面有足濟牛屎
臭konn-konn足歹摒的
王祥就掃帚攑咧
頭犁犁手無歇拚勢掃牛屎
無偌久伊就忝甲規身軀汗囉
掃規晡才共牛牢掃好爾
拄到厝 後母閣講
你去彼欉李仔跤共李仔顧予好
王祥隨越身閣行對李仔遐去矣
原來 王祥的生母真早就過身矣
老爸閣娶的這个後母
對王祥誠刻薄
偏偏仔後母
又閣足愛食這欉的李仔啦
王祥就坐佇李仔跤
那顧樹頂的李仔
閣那專心讀冊
無疑悟 天煞雄雄反烏落大雨矣
王祥咧想雨遮大
會共李仔沖甲落了了呢
規年嘛才干焦生這改李仔爾
莫閣落矣啦阿無阿母今年
就無上愛食的李仔通食矣啦
王祥那想那替後母毋甘
落尾 伊煞走去共李仔樹𢯾咧吼
王祥就是遮爾好心肝的人
雖罔後母對伊刻薄
伊猶原向望別人好
心內無半點仔怨嘆
毋過後母仝款對王祥遐歹
連竹箠仔嘛會提來捽王祥
有一擺
後母閣提竹箠仔對王祥直直捽
王祥佮進前仝款
攏無走閃 嘛無受氣
雄雄有一个人衝出來共王祥攬咧
擗 竹箠仔就拍佇伊的身軀頂
這个人共王祥攬咧
那吼那喝講 莫閣拍矣啦
這个人是siáng呢
原來是王祥仝爸各母
才五歲大的小弟王覽
後母發覺
唉哟 拍著家己親生的細漢囝囉
心肝毋甘搐搐
手隨緊擋咧 毋敢拍矣
囝仔 阿母毋是刁工的
無想著 猶遮爾細漢的王覽
心肝嘛遐好
閣知影愛保護阿兄
後來王覽有較大漢矣
伊問阿母講
阿兄人遐爾好呢
阿母是按怎定定欲共拍咧
阿母想想咧講
我就是無佮意你阿兄啦
毋過你免驚嘿
阿母毋是一直攏對你誠好呢
啊我向望阿母嘛愛疼惜阿兄啊
講煞 王覽共阿母的手䘼搝咧
目睭掠阿母金金相
因為有王覽的一直哀求
後母對王祥真正無像進前遐邇狼毒矣
經過幾冬後 有一冬的寒天
後母共王祥講 我想欲食鯉魚
唉喲 寒冷的北方寒人水面攏結冰矣
這个時陣佗位揣有魚咧
毋過王祥嘛是行出去揣魚
伊來到河邊
看著河水有影攏結冰矣
王祥越頭四界看看咧 嘛想無步數
落尾 伊煞共衫褪落來 覆佇冰的面頂
哇 才一睏仔爾
王祥就凍甲喙齒叩叩叫 叩叩叫
無偌久 冷閣𫝏的冰氣
就像針尾仝款遐鑿
一支閣一支揻入去王祥的骨頭內底
王祥寒甲規身咇咇掣
面仔嘛變甲青恂恂
王祥用家己身軀的燒氣
想欲共冰溶較薄咧
毋過人的燒氣
哪有法度共河水頂的冰溶散咧
佇這時陣 冰煞pia̍k一聲必開矣
煞有兩尾大鯉魚
家己跳起來冰頂
後母這馬真正有魚通食呢
厝邊隔壁聽著這層代誌了後
攏講是王祥大孝的心
感動天公伯仔
才有這款毋敢想的神蹟出現啦
庄頭巷尾的人
對王祥攏呵咾甲會觸舌喔
無疑悟
後母煞顛倒閣較無歡喜
想步數欲共王祥害予死
伊攢一鈷濫毒藥的燒酒
遮有一鈷誠罕見的燒酒
王祥你嘛試看咧 看好啉無
王祥才共酒斟好 拄欲啉爾
雄雄一支手伸倚來
嘛欲提彼杯酒
阿兄 這酒予我啉啦
出聲的人就是王覽
伊知影是𪜶阿母的毒計
王祥感覺怪怪
小弟一向都毋捌按呢咧
伊雄雄煞想通矣
敢講這酒內底有毒
一想著到遮
王祥就閣較毋肯放手矣
絕對袂使予小弟
替我啉落這杯毒酒啦
落尾一个強欲 一个毋肯
兄弟兩人相搶這杯毒酒
後母看著這款範勢
趕緊共酒捾咧走 攏莫啉矣啦
王祥才無去予毒酒害死
了後 便若是後母予王祥食的物仔
王覽攏會趕緊搶來代先食
過一站仔了後
後母才無想欲害死王祥的想法
就算按呢 王祥嘛毋捌氣過𪜶後母
因為𪜶兄弟仔做人好
才受著逐家的看重
到尾仔 𪜶攏予皇帝封做大官囉
無閒規工的王祥
安心矣睏去矣
王覽嘛守佇阿兄的身邊
微微仔笑睏去矣
月娘睏去矣
