
蔣慧云的小書包 台語版
175粉絲
晏子出使楚國,謀求兩國交好,應對稍有不當,就不能達成使命。他卻以其機智,巧妙地應對了三種不同考驗。
🍄 本集制作:
轉譯:阿昇
播音:于曉洪
配樂合成:淩雪
字幕:惠善
影片合成:芫安 瑛垓
監製:李智鳴 蔣慧云
🎒 訂閱小書包會員,讓孩子從故事長本事
#乾淨校園夏令營 #兒童
AI 生成·可能包含錯誤
視頻概述
AI 生成這是一個關於德國使者「暗主」前往曹國(中國)交涉的機智故事。面對曹王多次試圖透過門戶之別、身材嘲諷以及利用罪犯來羞辱德國使者的挑釁,暗主始終保持冷靜,以機敏的口才化解危機並反將一軍,最終贏得尊重並成功完成任務。
今仔日咱來講一个 機巧的矮仔的故事
足久足久以前的春秋時代
有兩个國家 齊國佮楚國
𪜶攏是強國
毋過𪜶兩个國家
一時仔結盟 一時仔閣對立
就親像兩个人
有時陣是朋友 有時陣閣變寃仇人
有一工 齊國的國王對一位大臣講
晏子 楚王最近定來唱聲
我欲派人去楚國交涉
你敢願意去啊
遵命 臣願意前往
看起來齊國和楚國這馬關係無啥好
齊王想欲阻止兩个國家變成寃仇人
所以這个任務並無簡單
齊王問的這位晏子 就是晏嬰
伊人真矮一粒仔痞爾爾
而且穿插真樸實
看起來無啥派頭
毋過晏子猶是答應矣
當晏子𤆬著部下來到楚國
伊徛佇城門口
攑頭報家己名號
齊國大夫晏平仲 拜見楚王
毋過目睭前的大城門 恬恬仔攏無振動
顛倒邊仔的一个細門拍開去
晏子的部下足受氣 講
楚王干焦開細門來接待你是對你的侮辱
就算部下無講矣
晏子心內真清楚
楚國按呢做毋但表面上笑家己矮
更加是想欲用這款方式藐視齊國
所以晏子老神在在 講
出派去狗仔國的人 就會對狗仔門入去
今仔日我派任的是楚國
無應該對這个門入去
負責接待的楚國官員一下想
哎呀 我若予伊對細門入去
毋就是講 阮家己是狗仔國矣
這就等於是侮辱阮家己矣
這哪會通
晏子就按呢光明正大對大門行入去囉
楚國這擺想欲侮辱晏子的計劃失敗矣
尾仔晏子進入宮殿 拜見楚王
楚王對頭到尾共晏子相規半晡
閣刁工問講
齊國敢講攏無人矣
晏子講 齊國的臨淄城
有三百條街仔路
街仔的人濟甲手䘼仔若展開
就會共天閘甲看無日頭
啊 若逐家汗𫝺𫝺咧
就袂輸咧欲落雨仝款
挨挨陣陣 人𤲍人 鬧熱滾滾
按怎會講無人咧
一聽 伊講齊國人真濟
楚王心肝內想講 你中計矣
伊隨連鞭問晏子
既然如此
按呢為啥物欲派你這款的來呢
意思是講 假使齊國人才真正這爾濟
按怎毋派一个較大範的人來咧
意思就是笑 晏子傷細漢
予楚王按呢侮辱
晏子敢有受氣 抑是不安咧
無 他真平靜 隨應講
齊國派任使者有家己的規矩
賢明的人予派去佮賢明的國家交涉
飯桶的人就予人派去無啥路用的國家
像楚王你所講的
我晏嬰上頇顢所以上適合來楚國
哎呦 晏嬰一來無佮楚王應喙應舌
閣予本來欲共蹧躂的計劃
顛倒卸著楚王家己的面子
欸 欸 楚王煞雞喙變鴨喙
等晏子離開了後
楚王愈想愈無歡喜
他就召集大臣講
這个晏子頭腦冷靜 個性定著真有喙水
啥人有辦法 會當共侮辱 一擺咧
無偌久 一位大臣行到楚王面前
獻出一个妙計
楚王一聽 目睭仁爍一下
伊那頕頭那講
嗯 好 明仔載就按呢去做
隔轉工 楚王辦腥臊款待晏子
逐家啉酒啉甲當歡喜的時陣
雄雄入來兩名官員
𪜶押著一个予人縛牢的犯人
行到楚王的面頭前
楚王問講 這个人是創啥物代誌
官員回答講
報 伊是齊國人 因為做賊偷予人掠著
咻一下
宴會廳內面的人攏恬喌喌
逐家攏越頭掠晏子相
逐家心肝內想
這聲齊國的使者就歹看面矣
楚王那看晏子那笑講
呵呵 看起來齊國人佮意做賊偷矣
欲按怎 犯人就佇現場
晏子敢猶有辦法辯解
這時陣晏子人徛起來
伊仝款寬寬仔講
大王 我聽講柑仔欉種佇淮河以南
就會發好食的柑仔
毋過若種佇淮河以北
發出來的就毋是柑仔 是歹食的枳矣
啊 是按怎這馬講對柑仔欉去矣
逐家拄佇咧捎無摠的時陣
晏子掠在座的人客相一輪 閣繼續講
這是啥物原因呢
因為水土無仝矣
佇齊國袂共人偷提物件的人
到楚國煞會去做賊偷
敢講毋是楚國的水土
予人變甲會去做賊呢
哎呀 這个原本料計是个妙計閣失敗囉
毋過楚王這擺嘛無受氣
伊大聲笑講
佮𠢕人拚注是寡人食飽咧換枵
就按呢楚王就好禮仔款待晏子
嘛無閣共齊國看無點矣
晏子出派楚國的任務成功矣
淮河以南的柑仔
恬恬仔佇柑仔欉頂頭睏去矣
晏子嘛佇回國的馬車頂 安心仔睏去矣
月娘嘛睏去矣
