金門閩南語國中補充教材讀寫金門第二冊第三課

第三課 南海夜臺
南風勻勻仔吹，白茫霧沓沓仔罩來，一陣人大大細細，手捾勾
籃，行過園岸，來到海墘邊，大母塊1的花崗石蟹2橫佇眼前，「南海
夜臺」，南海公長眠的所在就佇遮。大人喝聲發落3工課，對各鄉社
來的兄弟叔孫，有的除草，有的清墓桌，有的挂墓紙。一柱清香、
三鞠躬了後，眾囝孫順倚石蟹的懸低，坐咧聽陳先講古，隨金紙清
煙衝4懸，行入去六百年前的明朝時：「咱六郎公對宋朝尾來到下坑開基5。六百外年前九世祖陳顯，外號南海公，是金門明代中舉的頭一人。佇直隸北平州府的時，燕王知
伊有才情，欲請做幕僚；南海公知影燕王有野心，推講身體毋好，辭
官回鄉。誰知佇燕王篡位登基了後，猶是專工派人來金門，欲伊上京
鬥相共。南海公重情重義，面對這皇命佮義理的兩難，無奈何選擇成
仙做佛。
出山彼一日，一陣風共引路的紅燈吹來海墘大石蟹面頂，風水師
看了，頕頭講『進前三相才，退後萬人丁』；祖婆6心內按算：『佇朝廷
做官，厝內嘛是定定枵飢失頓7，猶是人丁興旺較實在』，就請風水師
盡量退。無想著棺材入壙8彼時，天頂烏雲斜來，雷聲霆、電火著，大
石煞乞9拍必開。風水師怨嘆講：『可惜！這風水石乞雷電破去，萬人
丁猶有，毋過會離鄉發展矣。』」
轉北風，霧雺10沓沓仔開矣！日頭迵過雲影光爍爍，坐佇石蟹面
頂的囝孫,一个一个起身伸伨11，看向南爿天拄起飛的飛機。六百年來，
萬人丁嘛種著12南海公的硬氣，飛向世界各地，開基散葉出頭天。