第四課 四月十二 迎城隍

jen的金手學園
jen的金手學園
295粉絲
134 次觀看·2024年2月22日

課文:

第四課 四月十二迎城隍
有城才有城隍，明朝官府為著海防利便，佇金門設千戶所閣起城寨1；東西兩爿上重要的就是田浦寨佮金門城，了後城隍廟才綴咧起起來。田浦嶽帝爺2佮金門城的城隍就對彼陣傳到今。後來，後浦變做規金門的防禦中心，佇1682 年四月十二彼一日，城隍爺對金門城分靈到後浦，沿路護送佮迎神的陣頭落落長，後浦四月十二迎城隍的風俗，就按呢，一年閣一年留落來。
四月十二後浦城隍爺踅境巡安的時陣，七爺八爺來開道，閣有四境的陣頭大捙拚3，規後浦鬧熱炊炊4；四境就是東門境、西門境、南門境佮北門境，一境有一境的特色。西門的蜈蚣座若轎用扛的，媠噹噹的妝人5囡仔坐許頂6，一个一个妝做7民間故事內底上精彩的人物。東門的蜈蚣陣是連起來的細台手㧣車8，面頂是打扮甲古典閣古錐的囡仔人，後壁閣有展功夫的囡仔旗隊，五花十色真影目9。北門境是北帝廟10的上帝爺坐境11，上帝爺𤆬境內眾神出壇踅境，扛輦的跤步攏特別訓練，輦駕舞弄甲若有神，人共號做「天下第一輦」。閣有藝閣、十二婆姐、弄獅佮弄龍，大人嘛來展技術。南門拍花草是一陣囡仔人沿路步輦、沿路展演，嘛叫「拍胸舞」佮「拍七響12」，聽講是閩越族13從早留落來的風俗。

迎城隍毋但是四境陣頭捙拚的舞台，嘛是傳統文化留落來的根底，咱看鬧熱也著會曉看技巧14，鬥陣共傳統閣湠生落去。

Comments are disabled for this video.